Konstruksyon ng NLEX Harbor Link magsisimula sa Marso

LUNGSOD NG VALENZUELA—Magsisimula na sa Marso ang konstruksyon ng P10-Bilyon proyektong Harbor Link kung saan isusudlong ang North at South Luzon Expressway (NLEX-SLEX) Link Project.

Ito ay matapos pangunanan ni Public Works Secretary Rogelio Singson ang ground breaking ceremonies para sa NLEX Harbor link sa Smart Connect Interchange sa lungsod na ito noong Huwebes, Pebrero 7.

Inilarawan ng mga opisyal ang nasabing proyekto bilang “one of the most important infrastructure project of the year” at inaasahang magpapaluwag sa daloy ng trapiko patungo sa pier at samga lungsod ng Caloocan, Malabon, Navotas, Valenzuela (Camanava).

Ang NLEX Harbor Link na inaasahang matatapos sa loob ng 12 hanggang 15 buwan, ay susudlungan naman ng NLEX-SLEX Connector Link Project na inaasahang matatapos sa 2016.

Rodrigo Franco, MNTC President & CEO

Ang walong kilometrong NLEX Harbor link ay ikalawang bahagi ng expansion project na ipinatutupad ng Manila North Tollways Ciorporation, isang subsidiary ng Metro Pacific Tollways Corporation (MPTC) ni Manuel V. Pangilinan na siyang namumuno sa  Metro Pacific Group.

Ayon kay Ramoncito Fernandez, pangulo at chief executive officer (CEO) ng MPTC, ang proyekto ay isang manipestasyon ng pagsuporta ng kanilang kumpanya sa public-private-partnership (PPP) program na pinasimulan ng administrasyong Aquino.

 “Harbor Link is a very good alternative to the C-3 Road and A.Bonifacio Avenue,” ani Fernandez patungkol sa mga lansangang dinadaanan ng mga naglalakihang truck patungo sa pier sa Port Area.

Ipinaliwanag naman ni Rodrigo Franco, pangulo at CEO ng MNTC na ang NLEX Harbor Link na magsisimula sa Smart Connect Interchange sa lungsod na ito ay may dalawang bahagi.

Ang unang bahagi  nito ay ang 2.4 kilometrong kalsada mula sa NLEX Smart Connect Interchange na kasudlong ng Mindanao Avenue Link.

 Ang dulo nito ay sa MacArthur Highway sa may Barangay Karuhatan.

Ito ay inaasahang matatapos sa loob ng 12 hanggang 15 buwan sa halagang aabutin ng P1.7-B.

Mula naman sa dulo ng unang bahagi ng Harbor Link sa Valenzuela ay isusudlong ang 5.6 kilometrong ikalawang bahagi nito na na tinawag na Segment 10.

Ang Segment 10 ay tatawid sa ibabaw ng MacArthur Highway, at dadaan sa ibabaw ng riles ng Philippine National Railways (PNR) hanggang sa makarating saC-3 road na patungo sa North Harbor.

Ang Segment 10 o ikalawang bahagi ng Harbor Link ay inaasahang matatapos sa loonb ng 24 na buwan sa halagang P6.33-B.

Mula naman sa C-3 Road ay magsisimula ang NLEX-SLEX Conector highway sa ibabaw ng  riles ng PNR hanggang makarating sa SLEX.  Dino Balabo

Galak, pangamba sa pagtatayo ng SM City sa Malolos

Malapit nga ba sa Radio Veritas compound itatayo ang SM City Malolos?

MALOLOS CITY—Ikinagalak ng mga residente ng lungsod na ito ang pagtatayo ng SM City Malolos, ngunit may mga nagpahayag din ng pangamba sa magiging kalagayan ng maliliit na negosyante.

Ito ay matapos malathala sa Facebook fan page ng isang pahayagang lokal ang impormasyon batay sa mas naunang pahayag ni Mayor Christian Natividad.

Ayon kay Jeddahmae Vistan, malaking tulong sa mga Malolenyo at iba pang Bulakenyo ang planong pagtatayo ng SM City Malolos.

Ito ay dahil sa mga oportunidad sa trabaho na ihahatid ng pagtatayo ng mall.

Inayunan din ito ni Isagani Giron, ang dating tagapangulo ng Samahang Pangkasaysayan ng Bulacan (Sampaka).

Ngunit nagpahayag din ng pangamba si Giron sa magiging kalagayan ng mga maliliit na negosyante sa lungsod na ito.

Sinabi ni Giron na isa sa posibleng epekto ng pagbubukas ng SM City Malolos ay ng pagsasara ng maliliit na negosyante.

Inayunan din ito ni Ramil Ortiz Reyes na nagsabing mas maaapektuhan ang nagsisipagtinda ng mga damit na ready to wear (RTW).

Sa kabila naman ng palitan ng kuro-kuro ng mga residente ng Malolos, sinabi ni Darius Correa na dapat nang masimulan ang pagtatayo ng nasabing mall dahil napag-iiwanan na raw ng Marilao at Baliwag ang lungsod na ito.

Ang dalawang nabanggit na bayan sa lalawigan ay kapwa mayroon nang SM City mall.

Kaugnay nito, umgong din ang palitan ng pananaw kung saan itatayo ang SM City Malolos.

May mga nagsabing sa likod ng Bulacan State University ito itatayo, at may mga nagsabi ring sa tapat ng relay station ng Radio Veritas sa kahabaan ng MacArthur Highway.

Ngunit para kay Christopher Cunanan, mas malaki ang posibilidad na sa tabi ng relay station ng Radio Veritas itayo ang mall, sa bahagi ng Barangay Dakila.

Ang kabilang panig ng ng Radio Veritas sa panig ng Barangay Sumapang Matanda ay kasalukuyang pinagtatayuan ng Robinson’s Mall.

Una rito, kinumpirma ni Mayor Natividad na bukod sa Robinson’s Mall ay posibleng masimulan na rin ang SM City Malolos.

Sa panayam, sinabi ng alkalde na apat na may ari ng lupa na lamang ang kinakausap ng pamunuan ng SM Mall.

Hindi pa tinukoy ni Natividad kung saan sa lungsod na ito itatayo ang mall, ngunit inilarawan niya ang pagtatayuan.

Ayon sa alkalde, itatayo ang mall sa isang 28-ektaryang lupain sa lungsod ng Malolos. Iginiit pa niya na ang nasabing lupain ay dating palayan ngunit halos hindi na pinag-aanihan.

Nilinaw ni Natividad na bukod sa mall ay magtatayo din ng iba pang pasilidad ang SM sa nasabing 28 walong ektarya, kabilang na ang mga high rise condominiums at mga call centers.

“Kung mall lang ang itatayo nila (SM), okey na yung five hectares, pero ang sabi sa akin ay tatayuan din ng SM Residences na mga high rise condominium, at saka mga facilities para sa BPO (business process outsourcing) para sa mga call centers,” sabi ni Natividad.

Sinabi pa ng alkalde na sa konstruksyon pa lamang ng SM City Malolos ay tiyak na lilikha na ito ng libo-libong trabaho.  Dino Balabo